URAG-URAGON!

Tigsik ko an inaapod na karma

Kun ano an gibo tang raot sa iba

Iyan sa satuya seguradong mabuwelta

Kaya an satong gibohon so tama sana!

Tigsik ko an totoong pinapakilaban

Dapat ipursigi, susteniran

Kun an saimong boot magmalaymay

Sa kangkongan ika mabukangkang!

Tigsik ko an Husticia sa kinaban

Kun digdi dae mo makakamtan

Iduduhol sa saimo sa kalangitan

Duman an Husticia dae nababakal!

Tigsik pa an Husticia

Iguang tahob sa mata

Hinungit dakol na kuwarta

Nya! Dagos nang nabuta!

Tigsik ko an abogado de campanilla

Nagraraganting an kuwarta sa bulsa

Hipid an pakaatado, nakakurbata

Sa husgado mayong casong ginana!

Tigsik ko an gurang na urag-uragon

Sa saiyang trono bastos, maisugon

Kan inaresto, aw ano ka, Nonoy?

Bigla bagang nagkuyumpos, rokrokon!