Viaje kan PNR dai pa makakaantos sa Legazpi

Sa tahaw kan kahagadan kan mga pasajero kan Philippine National Railways (PNR) na ibuelta na an viaje kan perrokaril haling Ciudad nin Naga sundo sa Ciudad nin Legazpi, alagad an manijamiento naglinaw na sagcod na dai pa natatapos an paghirahay kan tulay sa Guinabatan, Albay dai pa marerealisar asin kun mangyari posibleng sa masunod pang taon.

Nagbuelta an viaje kan Hulio 31, 2023 haling Naga PNR Station sundo ngona sa Ligao PNR Station mientras na dai pa puedeng makaantos sa Ciudad nin Legazpi huli kan problema sa tulay.

Si Greg Mano kan makaulay sa telepono kan Bicol Mail nagpahayag nagpapaseguro an saindang manijamiento nganing maibitaran an ano man na aberiya kan viaje sa sinambit na tulay.

Antes nagsikad an viaje hali sa Camarines Sur sundo sa Albay nagkunducir ngona nin inspeksyon kan ruta antes kan Hulyo 31, 2023 para sa safety kan viaje alagad naheling na kaipuhan pa an paghiraray kan tulay antes magbuelta nan viaje sa Legazpi.

Magigirumduman kan magbalik an commuter train pasiring sa Ciudad nin Legazpi kaipuhan suspendiron ngona kan Abril 2017 mantang nagkulang-kulang an rolling stock.

Dai sinda makatao nin inpormasyon sa pasajeros sagcod nagpapadagos pa an clearing operation.

Afuera kan ruta sa Camarines Sur asin Albay perang taon naman nagpapadagos an regular na viaje haling Ciudad nin Naga sundo sa Sipocot, Camarines Sur.

Sa ngunian an rutang Naga-Ligao inaabot nin labi sa duwang oras sa distancing 67 kilometrong laba kan riles. An mga estasyon kan perrokaril na inaagihan hali sa Naga, Pili, Baao, Ciudad nin Iriga, Nabua, Bato, anas digdi sa Camarines Sur; mantang an Matacon, Polangui, Oas, asin Ligao, gabos kan Albay.

Ngunian na panahon nin Peñafrancia inaabot na nin labi sa 400 an pasajeros sa sinambit na ruta. (dpa)