Viaje kan PNR sa Bicol madagdag sa Sept. ‘24

Magkakaigwa nin dagdag na mga viaje an Naga-Legazpi asin Naga-Sipocot kan Philippine National Railways (PNR) na piglalaoman marerealisar poon sa Septiembre 2024 sa panahon kan Peñafrancia fiesta.

Ini mangyayari oras na mag-arabot na sa Bicol an mga kotse, mga materyales, makina, maging crossing barriers na hali sa Manila mantang masara na an ruta kan Calamba-Manila nganing tawan buelo an North South Commuter Railways project.

Si PNR Naga Station Operations Division Area 2 OIC, Joel Dajac nagpahayag sa entrevista kan Bicol Mail mantang pig-aandam na ninda an rehabilitasyon kan mga relis sagcod nagkakaigwa nin clearing operations sa mga ilegal na estractura na yaon sa laog kan cinco hasta siete metros nganing maibitaran an aksidente.

Igwang mga tiendahan na yaon na sa ngangaan kan trabesiya na delikado sa aksidente an dapat magkaharali para makaibitaran an aksidente.

Magigirumduman kan magbuelta si rutang Naga-Legazpi igwang mga linya nin kuryente an tinamaan kan nagdadalagan na commuter train sagcod may naputol na poste.

Enot nang nabuelta an viaje sa rutang Naga-Ligao kan Hulyo 31, 2023 na nagdadakul na an pasajeros asin maninigo nang makaantos sa Ciudad nin Legazpi na nagpoon kan Deciembre 25, 2023.

Magigirumduman an regular na viaje kan Manila sinuspende kan Department of Transportation huli kan paglamasa kan makusog na Bagyong Ofel kan Oktubre 2012.

Kan suspendihon an viaje kan sinambit na taon alagad sa ngunian mayo pang asegurasyon an administrasyon Marcos kun ipapadagos mantang maging kan mga nakaaging administrasyon puros pangako sa Bicolano na ibabalik an viaje kan perrokaril Manila-Bicol.

Manga rutang Naga-Legazpi asin Naga-Sipocot kan Philippine National Railways (PNR) sa Bicol madadagdagan. (PNR)