Viaje kan PNR sa Bicol madugang, sabi

Piglalaoman na madugang an viaje kan Philippine National Railways digdi sa Camarines Sur, Albay asin Lucena train operation oras na padalaganon na an pitong kotse nin train digdi sa Bicol haling Tutuban Central Station sa Manila.

Enot nang pigpahayag kan manihamientro kan perokaril sa Bicol na dapat madara digdi kan nagtalikod na taon na posibleng maging central station an PNR sa Ciudad nin Naga alagad naabala.

Sa ngunian an manijamiento lokal kan PNR Bicol sa pamamayo ni Acting General Manager Deovanni Miranda nag-inspeksyon na sa Naga asin Legazpi na pwedeng gibohon na estasyon nganing digdi ibugtak mantang an iba sa Lucena.

An ruta sana kan commuter haling Camarines Sur asin pasiring sa Albay hale sa Naga PNR Station hasta sa Ligao PNR Station alagad oras na mag-abot posibleng maibalik na an ruta hale sa PNR Naga hasta sa PNR Station sa Ciudad nin Legazpi.

Afuera pa kaini, an iba pang ruta haling Naga PNR hasta sa Lupi PNR Station, parehong digdi sa provincia nin Camarines Sur.

Dakulang bagay an viaje kan perokaril digdi sa Camarines Sur asin Albay mantang barato an flete kumpara sa mga pampasaherong bus asin van.

Haloy nang piglalangkag kan mga Bicolano kun nuarin si enot na plano sa rehabilitasyon kan PNR Bicol mala ngani planong isundo pa an ruta sa Sorsogon alagad mayo man nangyari si pangako ni dating Presidente Rodrigo na mautang nin bilyones pesos sa nasyon kan China. Inabot na sa administrasyon ni Presidente Ferdinand Marcos Jr. mayo man nangyari sagcod sana sa pangako kan gobierno.