Viajeng Naga-Manila aprubado kan HERTF

Matapos kan sarong taon asin duwang bulan na suspendido an viaje kan mga pampasajerong bus huli kan pandemya nagdesisyon na an Health Emergency Response Task Force (HERTF) kan City Hall na ibuelta na an inter-regional route sa rutang Naga-Manila.

Sinabi ni Alcalde Nelson Legacion nagduwa-duwa an ciudad na tugotan na an viaje kan mga bus, alagad kunsiderasyon an pigtawan duon kan mientras na barato an flete asin dakul nang mga Bicolano an mawot nang makapuli sa saindang familia.

Si Nonoy Reforsado, operation manager kan Bicol Central Station (BCS) nagpahayag sa Bicol Mail na nagtugot man giraray an HERTF alagad kaipuhan ciertohon na ma-iimplementar an health and safety protocols.

Nagkapera pa sanang unit nin bus an mabuelta na kan saindang operasyon na nasa proceso na kan saindang pagkua nin special permit hale sa Land Transportation and Franchising Board (LTFRB) nganing magkayod ano man na aldaw ngunian na Hunyo 2021 alagad an BLTB nagtalaan na kan saindang pag-viaje Naga-Manila puon sa Hunyo 19, 2021.

Kabale sa estrictong ipapasunod na dapat cincuenta por ciento sana an capacidad kan bus nganing dai magsuroksokan an pasajeros.

Antes mag-abante an viaje, gabos na preparasyon sa health protocols an pig-andaman kan bus terminal management nganing areglado an pasajeros asin bus.

Si Director Antonio Gardiola kan LTFRB Bicol nagsabi na haloy na sinda nagtugot kan inter-regional route asin nahuri an Ciudad nin Naga huli kan padagos na paglangkaw kan caso kan Covid-19.

An Ciudad nin Naga base sa datus kan Department of Health sa Bicol haros aro-aldaw iyo an may halangkaw na caso kan virus.

An Albay, Sorsogon asin Camarines Norte an padagos na kan saindang viaje.

Alagad an viajeng Bicol-Manila, estrictong pinapasunod an inaapod na ‘‘point-to-point’’ boot sabihon ibinabawal an pag-pick up nin pasajeros sa ibang mga banwaan.

Nagpasalamat an mga tsuper asin operator huli ta buelta na sinda sa hanap buhay. (dpa)