Viajero nin hayop, bawal na sa CNorte

Igwa nang aksyon an Capitolio Provincial kan Camarines Norte sa kahagadan kan Department of Agriculture (DA) nganing makontrol an problema sa paglangkaw kan African Swine Fever (ASF) asin pagkulang- kulang suplay kan karning orig dapat ma-regulate an pagviaje kan hayop sa ibang provincia.


Si Gobernador Edgardo ‘‘Egay’’ Tallado nagpaluwas nin Executive Order 2021-13 na nag-iimponer nin temporaryong pagbawal sa pagtransportar kan buhay na orig paluwas sa saindang provincia.


Alagad pinalawig sana nin duwang bulan puon kan Febrero 9, 2021.


Apektado an hog traders kan paglangkaw kan caso kan ASF asin nadagdagan pa kan trak-trak nin viajero na naghahakot kan buhay na orig nganing darahon sa ibang provincia.


Ini an naheling na solusyon kan LGU kan provincia nganing dai magkulang-kulang an karning orig sa saindang mga mercado sagcod dai magparalangkaw an virus sa hayop.


Bako lang Camarines Norte an nag-aatubang kan kaparejong krisis sa hayop maging sa iba pang provincia kan Kabikolan alagad an aksyon kan Capitolio magpaluwas kan EO 2021-13.


Sa enot na mga pahayag kan DA Bicol sa paagi ni Emily Bordado, opisyal na parataram kan ahencia an pagpasar nin ordinansa o ano paman na aksyon sa pag-regulate sa pagviaje kan hayop saro sa makakatabang nganing makaresolber sa problema sa suplay asin virus.


Naglalaom an DA na magibo man nin aksyon contra sa viajero nin hayop an ibang LGUs sa Bicol sa kaparehong ginigibo kan Camarines Norte. (dpa)