Villafuerte sa Naga asin CamSur

Kan si Luis Villafuerte Sr aka “LRV” magpuli sa Bikol kan 1978, martial law pa kaidto, bistado siyang Imelda Boy. Inako man pati ni Imelda sa pakikipag-olay sa lokal na media duman sa harong ninda sa Batac na tinabangan niya si Louie. Pinadalagan siyang kandidato nganing maguin miyembro kan Interim Batasang Pambansa (IBP) sa lindong kan Kilusang Bagong Lipunan (KBL). Kairiba niya kadto sa tiket si Secretary Francisco “Kit” Tatad kan prensa (taga Catanduanes) asin Noli Fuentebella kan Partido district saka si Socorro de Castro kan Bulan, Sorsogon.

Antes kan karampanyahan nahimo niya na ribayan an liderato kan Naga hali ki Enteng Sibulo an incumbent mayor pasiring sa kamot ni Atty. Lut del Castillo, sarong dating konsehal na miyembro kan Nacionalista Party. An city administrator iyo si Renato V. Magtuto, aking matua ni Pudit na tugang ni Luis asin matuang tugang ni ngunyan nagdadalagn para congressman Nonoy V. Magtuto.

Sa IBP election na regionwide narisa na an sintikan ni Villafuerte saka ni Kit Tatad pati kan mga Fuentebella. Si Governor Felix Fuentebella iyo an chairman kan KBL sa Bikol kaidto.

Sa kaenterohan topnotcher pa si Kit Tatad palibhasa siya miyembro pa kan gabinete alagad sa CamSur, an pinakadakulang provincia kan region V, si LRV an nangenotan o No 1.

Narisa na tolos an fuersa kan TOYM awardee na si LRV, 40 anyos na bagong magretira bilang senior vice-president kan Bancom, respetadong banko na bistado sa pig-aapod na investment bank, solo asin primero sa Pilipinas. Diyan siya naguin TOYM awardee bilang nangengenot na investment banker sa Pilipinas.

Antes magpoon an kampanya, bilang premyo kan banko sa juven na executive pinabiyahe siya asin an enterong pamilya sa bilog na kinaban.

An primerong inataman ni LRV iyo an media, broadcast asin print. Nakua niya an tolos an lealtad asin pagsaludar kan mga taga prensa arog ni Paco Felicidario, Weng Santo Domingo, Luising General, Pidong Tria, asin Mon Talaram.

Sa broadcast media o sa radyo, an pinakamakusog na pighahalian kan bareta asin opinion sa aire, nagmukna siya nin bagong grupo nin mga juven asin sikat na announcer na igwa nin credibilidad asin nagbukas nin bagong estasyon na Super 10k na an kusog kan signal bako lang nakakaabot saa palibot kan rehiyon kundi lampas pang Quezon province, Romblon, Mindoro asin Palawan.

Duman narisa an kusog kan fuersa sa politika kan juven asin artistahin na politiko ( sabi kan iba mas gwapo pa daa ki Erap Estrada), madunong ta nagtapos nin abogasiya sa UP, orador asin debatista sa universidad, an esposa Ilokana pero may dugong Bikolana, nag topnotcher sa bar exam kan 1958, parasurat sa Phippine Daily Express, an diyaryo nasyonal na pugol ni FM kan panahon idto asin perming naka-ngisi, karinyoso sa mga tao asin nakiki-estoryahan maski kiisay sa enterong magdamlag dapit sa kun anu-anong isyu kan aldaw.

May mga tao siya sa Sorsogon, Masbate ta an saiyang esposa taga duman an ina, Catanduanes, Albay, asin Camarines Norte.

Naguin siyang miyembro kan gabinete ni Marcos bilang trade minister, kundi kan magadan si Senador Ninoy Aquino bigla siyang naglipat sa oposisyon asin naguin orihinal na miyembro kan bantugan na “Apat na Aguila” na compuesto ninda Edmundo B. Cea, Ciriaco R. Alfelor, Rolando Andaya Sr asin LRV.

Poon 1983 an grupo simbolo kan oposisyon arog kan Pusyon Bisaya sa Cebu, an Apat na Aguila siring man sa Bikol na nag-oyon sa EDSA Revolution kan 1986-1987 na nagpaluya kan liderato ni Marcos asin Imelda.

Sa mata kan kadaklan na Bikolano si Villafuerte na an paglaom kan Bikol na sarong lider na mahawas kan Kabikolan sa grabeng pagtios, maluyang hiro kan ekonomiya asin kawaran nin paglaom kan mga namamanwaan.

Pero an persepsyon kan panahon na idto, maski si LRV taga Naga, namundag sa Naga asin may harong na pinatugdok sa harani kan Basilica Minore pero sabi daa maski makusog siya sa provincia asin sa Bikolandia maluya siya sa ciudad nin Naga huli sa manlaen-laen na dahilan.

Nagbalyo siya nin opisyal na estada sa banwaan nin Pili, an capital town kan CamSur tanganing magdalagan para gobernador kan pinakadakulang provincia. An kakusugan na iyan kaidto matetesting ngunyan na masunod na eleksyon sa ciudad nin Naga.