Villafuertes dai nag endorsar nin presidential candidate
Pili, Camarines Sur --- Antes magsikad an campaign period sa mga candidato lokal sa Marso 25, an mga Villafuerte sa Camarines Sur nag-desisyon na mayong eendorsar nin candidatong presidente sa maabot na eleksyon sa Mayo 9, 2022 envez an candidatura sana ni Alcalde Sara Duterte-Carpio bilang candidatong bise presidente.
An punto igwang Bikolanang napapalaban sa eleksyon nasyonal si VP Leni Robredo na candidato sa cargong presidente.
Naenot kaini, nagluwas sa mga impormasyon na an saindang susuportaran na presidential candidate iyo si Bongbong Marcos (BBM) alagad piglinaw na an saindang panindugan sa candidato nasyonal.
Sa ginibong tiripon kan Sabado, Febrero 12 sa Capitol Convention Center kan mga Villafuertes sa saindang mga candidatong alcalde, vice alcalde, mga consejales, vocal asin bise gobernador na pinangenotan ninda Congresista LRay Villafuerte, Gobernador Migz Villafuerte asin Luigi, pig-anunciar ni LRay na mantang igwang napapalaban na Bikolana sa presidential election sinabihan an saiyang mga kaalyadong candidato na ‘‘bahala na kamo kun sisay an gusto nindong candidatong presidente’’, urupakan an saindang suportadores.
An desisyon kasunod man kan mga kahapotan kan saiyang mga candidato kun siisay an saindang dapat suportaran na candidatong presidente.
Si Vokal Romulo Hernandez kan segundo distrito kan Camarines Sur na midbid na dayupot sa lehislador nagsabi na antes nagdesisyon an Villafuertes nag-agi muna sa konsultasyon.
Igwa nang mga candidatong alcalde asin bise alcalde na kaalyado kan Villafuertes an tolos man nag-post na sinda yaon na sa kolor rosas ni VP Robredo, sabi pa ni Hernandez.
Si dating Congresista Rolando Andaya Jr. asin 19 mga incumbent mayors kan Anduyog party asin candidatong bise gobernador asin vocal iyo an pig-eendosar ni VP Robredo na iyo an suportadong candidato lokal sa ginibong nindang tiripon sa Tigaon, Camarines Sur.
Afuera pa kaini kan Febrero 8 sa enot na aldaw na campaign period sa mga candidato nasyonal, si VP Robredo saiyang pig-anunciar sa mini rally sa Libmanan, Camarines Sur na si Andaya iyo an saiyang candidatong gobernador.
Sa limang mga candidatong gobernador si Bise Gobernador Imelda Papin iyo an candidatong gobernador ni presidential candidate Bongbong Marcos asin vice presidential candidate Sara Duterte-Carpio. An duwa pang ibang candidatong gobernador iyo sinda Ireneo Bongat Jr. na dati nang nagcandidatong vocal kan 2019 elections asin an negosyante Richard Cabal parejong independiente.
Sa sinambit na tiripon mayo pang malinaw kun si siyam na mga candidatong alcalde na kaalyado kan Villafuertes na nagpa-retrato kaibanan si Bongbong Marcos iyo man giraray an saindang suportadong presidential candidate.
An siyam na mga incumbent mayors kinababalehan ninda Fermin Mabulo (San Fernando); Migay Ibasco (Bula); Melaine Abarientos (Del Gallego); Weny Sabalbero (Casusao); Nelson Legaspi (Canaman); Cris Lizardo (Minalabac); asin Leonardo Agor (Gainza).
Alagad si tolong ibang alcalde sa Camarines Sur na kaibanan sa sinambit na grupo ni LMP President Mabulo, nagpahimotik na nag-alyado na sinda ki Marcos asin ini sinda Boy Franco (Pamplona); Anthony Reyes (Milaor) asin Tomas Bocago (Sipocot).
Saindang piglinaw na nag-atendir sana sinda sa miting kan Liga nin mga alcalde alagad si VP Robredo iyo man giraray an saindang candidatong presidente.
An retrato na yaon an mga alcalde na kaalyado ni LRay nagluwas sa sarong articulo sa Manila Times kan Enero 19, 2022. (DPA)