Virtual graduations ipapasunod kan DepEd

Liwat iginilid kan Department of Education (DepEd) sa Ciudad nin Naga an face-to-face (F2F) closing ceremonies envez ipapasunod giraray an virtual graduations sa elementarya asin secondarya.


Matatapos na an school year 2020-2021 sa Sabado, Hulyo 10 asin isusunod na digdi an simpleng mga virtual graduation ceremonies puon Hulyo 12-16 alagad magdedepende na sa escuelahan kun nuarin itatalaan.


Si Dr. Manny de Guzman, City School Division Superintendent kan DepEd Naga nagpahayag padagos na apektado an dating seremoniya na iyo an hinahalat kan mga estudiantes asin kan saindang magurang alagad huli kan pandemya estrictong pinapasunod sa sainda kan opisina sentral an F2F.


An virtual program para sana sa grade 6, 10 asin 12 mantang si may mga academic performance marecibe kan saindang award asin ini recorded na sa saindang residencia na iyo man an ipapaheling sa virtual graduation. Hinale na kan DepEd an mga extra award huli ta limitado na an actividades.


Alagad sinabi pa ni de Guzman nag-isyu nin memorandum an opisina sentral kun magkakaigwa nin closing ceremony ngunian na school year 2020-2021, bako nang mandatory sa mga escuelahan.


Kabale pa sa puedeng gibohon iyo an house-to-house recognition bilang opsyon sa face-to-face activity, alagad an opisyales kan escuelahan puedeng magbisita sa harong kan mga magraduar na estudiante nganing magrecibe nin award.


Sinabi man ni DepEd regional director Gilbert Sadsad an magurang dapat igwang koordinasyon sa paratukdo sa saindang closing ceremony kun mawot ninda na an saindang aki nagrerecibe nin sertipiko o medals nganing gibohon an house-to-house awarding.


An Parent Teachers Association (PTA) nagpahayag napaboran digdi an mga pobreng magurang nganing dai na magastosan sa ano man na kontribusyon asin babakalon na bado sa tahaw kan nagpapadagos pang pandemya. (dpa)