top of page

Visual artists group pig-organizar

Ni Sonny Malate


SAN JOSE, Camarines Sur ---  Binilog an bagong grupo nin mga visual artists  kan nakaaging semana digdi. An grupo pinangaranan na United Visual Artists in Partido (UVAP) asin compuesto nin mga talentadong individual gikan sa ika-apat na distrito kan probinsiya na may passion sa linya nin visual arts.


Napili bilang pamayo kan grupo  an mismong kagtugdas kaini, si Rodge Merabil, sarong activong visual artist  na midbid man an tibay sa tattoo art.  Si Merabil sarong graduado sa cursong Fine Arts, haloy nang organizer nin mga art events asin may sadiring  tattoo art studio sa banwaan nin Goa.


Segun ki Merabil, katuyohan kan pagbilog kan UVAP para maging pusog saka sararo an grupo ninda. Siring man, tanganing makacontribuer sa pagparambong kan arte asin cultura sa paagi nin activong participasyon kan comunidad asin  collaboration sa ibang grupo saka institution.


Kadaklan kan mga miembros kan UVAP mga huben pang visual artists alagad may dakulang potential sa linya nin arte, naging mga ganador na sa art competition bako sanang sa Partido area kundi maging sa ibang lugar.


Saro sa mga hubenes na miembro iyo si Ruden Jardin kan banwang Presentacion. Apwera sa pagiging pambihirang pintor, ini saro pang musikero, photo asin video artist, dancer, choreographer asin practitioner nin iba pang art genre. 


Nagseserbi man na dagdag na asset kan grupo an premyado asin orgulyo kan Partido na si Kagawad Nelson 'Pintor' Enciso kan banwaan nin Goa. Siring man, an art teacher na si Nelson Darilay asin an maestrong si Jojit Cano na apwera sa pagiging de calibreng  visual artist, matibay pa man na  parasurat, musikero asin talentado sa iba pang linya nin kabatiran.


Maogmang pigbuyagyag kan pamayo kan grupo na sa mga maabot na bulan, an UVAP magkakaigua kan primerong art exhibit kaini. Ini sa pakikipagtabangan sa sarong local government unit sa Partido. Magkakaigua man ining mga mural project sa mga pampublicong lugar sa mga banwaan sa Partido. 


Dagdag pa man ni Merabil na an UVAP, kaiba  an saro pang local art group asin sarong gobyerno local sa Partido an  posibleng magkaigua nin collaboration para sa paghimo nin art gallery sa laog kan taon na ini.


Piglalaoman na an art gallery maserbing dalan sa pagkakaiguang makolor, activo asin bibong eksena nin arte asin cultura sa ika-apat na distrito kan probinsya sa mga maabot na bulan.


Manonotaran na enot nang nagkaiguang arts group sa Partido Area kan nagtalikod na taon. Nagkaigua man nin sanga an Salingoy Art Group digdi. An midmid na grupong ini pigtugdas kan international artist,  Pancho Piano na tubong Lagonoy, Camarines Sur.


Si Piano na padagos na may piggigibong mga  art events sa laog asin luwas kan nacion nagseserbing  inspirasyon kan mga huben na visual artists. Hale sa sarong middle income na pamilya sa barangay Mangogon, Lagonoy, ini naglapigot asin naging dakulang pangaran sa international art scene.


Piglalaoman na an pagbutwa kan mga art group madara nin dagdag kolor asin buhay sa arte asin cultura kan sociodad. Ini orug na mapaparikas  sa paagi nin pinagsararong esfuezos kairiba an local na gobyerno, academe, mga non-government organization asin ibang sector kan comunidad.


Piyesa ni Nelson “Pintor” Enciso, miembro kan United Visual Artists in Partido (Photo-GOART)
Piyesa ni Nelson “Pintor” Enciso, miembro kan United Visual Artists in Partido (Photo-GOART)

Comments


bottom of page