top of page

VM De Asis sinimbag an surat ni Robredo vs kontrobersiya sa LGU

Ni Paulo DS. Papa


DAGOS nang nagtaram an pamayo kan Sangguniang Panlungsod kan Naga manungod sa saindang fact-finding na susug man sa kahagadan ni dating bise presidente Leni Robredo na nakapalaman sa sarong surat na nagkrear nin dakulang kontrobersiya sa local na gobyerno.


Marurumdoman na pigsapubliko sa paagi kan programang “Doble Pasada” kan RMN DWNX an nagkapirang parte kan surat ni Robredo sa mga miembros kan sanggunian.


Kabale sa surat iyo an isyu sa small town lottery kinababalehan kan sarong department head kan city hall na suboot nagreresibe nin dos por syento kan P600,000 na kantidad nin daily income hale sa operasyon kan nasambit na pakawat.


Apwera pa kaini, an pigsasabing pamayo kan sarong departamento kan city hall harani sa sarong konsehal kan Naga. Nakapalaman man sa surat an SP share, hale sa STL, na suboot pigsosolo kan sarong miembro kan sanggunian.


Durante kan nasambit na programa sa radio, pigsabi ni Bise Alkalde Nene De Asis na pakaresibe kan surat tolos na nagtiripon an miembros kan sanggunian tanganing maaraman kun parareho an laman kan surat sa sainda.


Pig-osip kan opisyal na kumpirmadong pararehas an nagin laman kan surat sa sainda.


Pigsabi ni De Asis, an miembros kan Sangguniang Panlungsod kan Naga an makonduser kan fact-finding na pighahagad ni Robredo tanganing makumpirmar kun nanggad totoo an mga anomaliya na yaon sa surat kan dating bise presidente.


Sabi pa ni De Asis, nagpoon na an fact-finding sa kada miembro kan sanggunian, kabale na siya.


Alagad nakiolay an bise alkalde ki Alkalde Nelson Legacion na sabihan an iba pang mga empleyados kan city hall na pigpangaranan sa surat na dae makiaram tanganing dae maimpluwensyahan an mga ihahapot kan sanggunian kasumpay kan fact-finding.


Sa presente mayo pa nin kasiguraduhan an bise alkalde kun iaagi sa surat o personal na pakikiolay ki Robredo an resulta kan fact-finding alagad nagpromesa ini na magigin honesto an durasyon kan imbestigasyon.


Sa lado kan mga nagdangog asin nagdalan kan interview ni RMN DWNX Station Manager Eddie Ventura ki De Asis, may mga nagsabi na dapat an National Bureau of Investigation an magkonduser kan fact-finding.


Igwa man nagsabi na mayo nin kamugtakan an fact-finding kun kabale sa mga maimbestigar iyo mismo an dapat na isairarom sa fact-finding.

Comentarios


bottom of page