VM kan Camaligan, CSur nagdemiter sa pwesto

Apesar na binotohan kan mga taga Camaligan, Camarines Sur nganing maserbe bilang elihidong bise alcalde sa laog nin tolong taon alagad tinapos an 18 diyas naghelig sa saiyang pwesto.

Si Bise Alcalde Marilou Marquez Hirose (PDP-Laban) nagsumiter kan saiyang ‘‘resignation letter’’ sa opisina ni Alcalde Diano Ibardaloza Jr. bitbit an saiyang staff mga alas 8:30 nin aga kan Lunes, Hulyo 18, 2022.

Sa surat copy furnished an Sangguniang Bayan asin opisna provincial kan Department of Interior and Local Government.

An consejal na nangenotan o nag-top 1 sa resulta kan nakaaging eleksyon iyo si Josefina Azur asin bilang immediate successor siya an maribay sa pwesto kan bise alcalde.

Dai naman nagtao kan iba pang detalye si Ibardaloza kun ano an iba pang nakasurat sa biglaan na pagdemiter afuera kan pagpasalamat ni Hirose sa namamanuan kan Camaligan matapos botohan siya nganing iyo an magtukaw na bise alcalde.

Si Ibardaloza kaalyado sa PDP Laban ni Hirose, nagsabi na personal an nakasurat na dahilan kan biglaan na pagdemiter kan bise alcalde.

Sinabi pa na si Hirose huring nakaulay kan jefe ejecutivo kan ini mag-turn over kan Office of the Mayor kan Hunyo 29. Kan Hunyo 28 nag-atendir pa an bise alcalde sa oath taking ninda.

Pigbuyagyag pa na sa inaugural session kan Sanggunian Bayan awsente an bise alcalde komo presiding officer alagad an dahilan may kamatian o naka-sick leave.

Kan Hunyo 30, 2022 nag-filed siya nin pagbabakasyon poon Hulyo 4 hasta Hulyo 8 alagad naghagad pa nin extension sagcod na nagsumiter kan saiyang ‘‘resignation letter’’ kan Lunes, Hulyo 18.

Pinahimotikan kan jefe ejecutivo an mga inpormasyon na igwa sindang dai pagkakaintindihan. (dpa)