Volunteers, supporters ni Atty. Leni preparado na sa Jesse’s 65th B-day

Preparado na an grupo kan volunteers asin supporters sa Bicol ni dating Bise Presidente Leni Robredo sa nakatalaan na ‘‘Jesse’s 65th Birthday Anniversary’’ ni dipuntong dating alcalde asin DILG Secretary Jesse M. Robredo na an mayor na actividades gigibohon sa Carmen Hotel, Peñafrancia Ave., Ciudad nin Naga sa Mayo 27, 2023.

Si dating Consejal Atty. Mila Raquid Arroyo kan Ciudad nin Naga asin naging lider kan Solid Leni sa nakaaging eleksyon presidential nagsabi magkakaigwa ngona nin misa alas cinco nin hapon sa Eternal Garden sa Barangay Balatas na digdi linubong an dipuntong DILG Secretary na magiging presente si Camarines Sur 3rd district Congressman Gabby Bordado asin iba pang mga opisyales lokal kan ciudad.

Pakatapos kan misa maralakaw hale sa Balatas road sundo sa Carmen Hotel na digdi gigibohon an simpleng mga actividades.

Nakasurat sa libro si mga agi-agi ni dating VP Leni Robredo sa saiyang pagkampanya kan nakaaging eleksyon presidential kabale an saiyang pag angkas sa motorsiklo na an nagmamanijo Marcos supporters. (Atty. Robredo FB)

Sinabi pa ni Atty. Arroyo an mayor na actividades sa hotel iyo an launching kan #TayoAngLiwanagBook asin signing events sa mga volunteers and supporters sa Camarines Sur asin iba pang provincia kan rehiyon cinco asin magkakaigwa nin konsiyerto.

An sinambit na hotel pig-okupar kan Solid Leni Bicol asin mga volunteers bilang pagrehiyonal na campaign headquarter.

An Tayo ang Liwanag Book mababasa si mga agi-agi kan nakaaging campaign period ni VP Leni kan nakaaging eleksyon presidential.

Maheheling sa mga retrato asin mababasa si historicong paglibot-libot kabale si pangyayari kun panong nakaangkas sa motorsiklo na an nagmamanijo sarong Marcos supporter. (dpa)