Voter’s registration liwat pigpadagos kan Comelec

Nagpapadagos giraray an voter’s registration para sa Barangay asin Sangguniang Kabataan Elections (BSKE) na nagpoon kan Oktubre 20, 2025 hasta sa Mayo 18, 2026 alagad kulang pa an nagpaparehistro sa mga opisina lokal kan Commission on Election (Comelec).

Sa Ciudad nin Naga, sinabi ni Election Officer Atty. Maico Julia Jr. na bukas an saindang opisina poon alas 8:00 nin aga hasta alas 5:00 nin hapon cada aldaw nin Lunes hasta Sabado.

An gabos na aplicasyon rerecibihon kabale na si nagbalyong residencia mantang sa lado kan SK dapat nag-eedad nin 15 hasta 17 anyos asin si 18 anyos pataas. Nagpagirumdum liwat si Julia na kinakaipuhan iguang darang validong ID huli ta dai na ninda aakoon an cedula asin certificasyon hale sa Barangay.

An Barangay asin SK elections pigtalaan sa Noviembre 2026 cada ika-apat na taon base sa Acta Republica 12232.

An isyu sa pag-uktaba kan pirilian pigcuestion sa Corte Suprema ni Election Lawyer Romulo Macalintal, alagad hinahalat-halat sagcod sa ngunian kan Comelec.

Sinabi pa ni Julia si ginibong voter’s registration kan Agosto 1 hasta 10, 2025 kulang si nagpalista sa mga opisina lokal kan komisyon.

Liwat mabalik sinda sa mga barangay asin Malls nganing gibohon an satellite registration.