Voters registration sa CSur apektado kan pandemya

Dugang na mga satellite registration asin mahiwas na inpormasyon sa publiko nganing maglangkaw an mga mapalista sa mga opisina lokal kan Commission on Election (Comelec) tanganing makaparticipar sa eleksyon sa Mayo 2022.

Hababaon an voters registration huli kan pandemya alagad an estratihiya kan commission iyo an massive information campaign asin satellite registration sa mga banwaan nganing ipaliwanag na bukas an saindang opisina para magrecibe kan voters registrant.

Ini an mga pahayag sa Bicol Mail ni Election Officer Maico Julia Jr. kan Ciudad nin Naga asin opisyal na parataram kan Comelec Camarines Sur mantang pigtalaan an ultimo diya sa pagpa-rehistro sa Septiembre 30, 2021 asin an filing kan certificate of candidacy sa Oktubre 1- 8 sa kaparejong taon.

Maging an national office kan Comelec nagkumfirmar na naheheling ninda sa report kan mga opisina rehiyonal hababaon pa an numero alagad pigtutubodan ini na apektado an mga aplicante mantang dai pa nahahale an problema sa pandemya.

Sinabi ni Julia na maabot pa sa 400,000 an kaipuhan magpalista sa mga opisina lokal sa Camarines Sur.

Pigkakarkulo na nasa setenta por ciento pa an dapat makahabol sa Comelec continuing registration hasta sa Septiembre 30, 2021. Buot sabibon nasa treinta por ciento pa sanang mga registrants para sa masunod na national asin local elections, sabi pa.

Nagpuon an voters registration kan Septiembre 1, 2020 halangkaw pa an caso kan coronavirus disease (Covid-19) asin sagcod sa ngunian nag-aalangan an magpapalista kun nagdadakul na an maparehistro mantang naglilikay sa virus.

Napuon alas 8:00 ninda aga hasta alas 3:00 nin hapon sa mga aldaw nin Lunes asin Juevez an pagrecibe kan maparehistro.

An calificado nang dapat magparehistro nag-eedad nin 18 anyos pataas asin si mga transferee asin si mga hinale sa listahan mantang duwang veces nang nagpalyar na magvoto. (DPA)