VP Duterte nagbisita sa CamSur
Binisita ni Bise Presidente asin DepEd Secretary Sara Duterte an Camarines Sur kan Agosto 27, 2022 nganing pangenotan an pagbasbas kan duwang unit kan sarong escalon na may tolong classroom building sa Sitio Lipata, Brgy. Gogon kan banwaan nin Caramoan.
Nagpasalamat an lokal na gobierno kan Caramon sa pamamayo ni Alcalde Marilyn Socorro Co, Bise Alcalde Dyan Ramirez asin Sangguniang Bayan huli ta naabot kan bise presidente an harayong banwaan kan Partido area ngani sanang pangenotan an actividad.
Sa mensaje kan VP saiyang pinaabot an pag-omaw sa gabos na mga paratukdo huli kan saindang dedikasyon sa pagtukdo sa mga inaapod niyang ‘‘last mile schools’’ nganing matawan nin tamang edukasyon an mga kaakian.
Sinda Gobernador Luigi Villafuerte, VP asin DepEd Secretary Sara Duterte binisita an Sitio Lipata, Brgy. Gogon, Caramoan, Camarines Sur nganing pangenotan an pagbasbas kan bagong School Building. (Retrato hale sa FB page ni VP Sara Duterte)
Kaibanan ni Duterte an joven na Gobernador Luigi Villafuerte, yaon man an mga opisyales kan DepEd Bicol sa pamamayo ni Director Gilbert Sadsad, mga opisyales kan DepEd Camarines Sur sa pamamayo ni School Division Supt. Loida Nidea, Asst. Division Supt. Sueno Luzada Jr, asin iba pang mga opisyales kan DepEd CamSur asin maabot sa 500 na mga paratukdo an presente sa actividad asin an mga estudiante sa elementarya.
Nagtao nin mga bag sa mga nag-aadal sa elementarya komo parte kan programang PagbaBago kan Opisina kan Bise Presidente.
Poon kan magbisita an VP asin Secretary kan ahencia nagagamit na kan mga kaakian an mga bagong classrooms.
An Sitio Lipata, Brgy. Gogon dai pa inaabot nin suplay nin kuryente alagad igwa nang pribadong grupo na nginaranan na Lopez Group of Companies nganing magpa ilaw sa paagi kan solar system na posibleng marealisar ngunian na bulan nin Septiembre 2022.
Afuera sa pagbisita sa Caramoan nagkaigwa nin closed door meeting si Duterte sa mga opisyal kan DepEd sa opisina kan DepEd sa Pili, Camarines Sur asin nagbista nin halipot na oras sa Ciudad nin Naga. (dpa)