VP Leni nag-eestar na sa Magarao

Igwa nang bagong estaran sa barangay Carangcang, Magarao, Camarines Sur si Bise Presidente Leni Robredo asin nagtutubod na si Punong Barangay Nenita Aspe parte na ini kan plano kan bise presidente nganing magcandidatong gobernador sa eleksyon lokal sa Mayo 2022.


Ngunian na semana piglalaoman na maparehistro na si Robredo sa Comelec Magarao nganing digdi na siya magvoto sa maabot na eleksyon.


An Ciudad nin Naga sarong independent city na nag-eerok sa brgy. Dayangdang asin rehistradong votante si VP Robredo kan ciudad alagad kun macandidato siya sa luwas kan ciudad discalificado asin dai tinutugot kan ley, sabi pa kan opisyal kan Comelec.


Alagad sa mga pahayag ni Congresista Gabby Bordado kan tercer distrito kan Camarines Sur asin kaalyado ni Robredo sa Partido Liberal (LP) mayo pa nin pinal na desisyon an bise presidente mientras sa maabot pang Oktubre 1 hasta 8, 2022 an paglantiar nin certifico de canditura sa Comelec para sa eleksyon nasyonal asin lokal.

Retrato sa baba bakanteng 1,500 metros cuadradong lote na papatindogan nin sadiring harong ni VP Robredo sa balyong tinampo iyo an semi-bungalow residencia na arkilado kan bise presidente. (DPAureus)



An bise presidente nagpahayag na sa media na andam siyang magcandidatong presidente maging sa puesto lokal.


Si Punong Barangay Aspe kan Carangcang nagkumfirmar na nag-aarkila na si Robredo nin residencia kan bulan pa nin Marso 2021 sa saiyang barangay asin sa balyong tinampo nagpapa-konstruhir nin sadiring residencia.


Si Oscar Federis taga brgy. Carangcang nagkumfirmar sa Bicol Mail na saiyang harong an pig-aarkilahan na semi-bungalow kan bise presidente.


An arkiladong residencia naheling na kan Bicol Mail kaibanan si dating Consejal Julian Lavadia Jr. kan Ciudad nin Naga.


Si Robredo rehistrado bilang votante sa Barangay Dayangdang, Ciudad nin Naga, kun rehistrado na siya sa Comelec bilang votante sa zona dos brgy Carangcang, Magarao calificado na siyang magcandidatong gobernador.


Sinabi ni Atty. Maico Julia Jr. Election Officer kan Ciudad nin Naga asin opisyal na parataram kan Comelec Camarines Sur an sarong taon na residency antes kan eleksyon base sa probisyon kan Local Government Code calificado nang magcandidato sa arin man na posisyon lokal.


Sa pagtubod ni Bordado napapanahon na idagos na ni Robredo an pagdalagan sa eleksyon nasyonal bako lang calificado sa posisyon alagad dakul na an masuporta nganing siya an pambato kan oposisyon sa maabot na election presidential.


An grupo ni dating Congresista Rolando Andaya Jr. kan premir distrito kan Camarines Sur preparado na suportaran si Robredo ano man na oras na magdesisyon sa pagcandidatong gobernador.


Si Andaya, enot nang pig-declara kan oposisyon sa Camarines Sur bilang interim candidate for governor alagad kun magbaba si VP Leni na magcandidato lokal andam man na magpahunod an dating congresista kan premir distrito. (DPAureus)