VP Robredo calificado sa cargong gobernador
An arin man na elective local official dawa nagpalyar makarehistro sa Commission on Election (Comelec) sarong taon antes kan eleksyon pueding magrehistro sa Comelec sagcod sa ultimo diya kan registration day.
Ini base sa Section 29 Chapter I kan Local Government Code of the Philippines, sabi kan Comelec Camarines Sur
Nin huli kaini, dawa dai pa nakarehistro sa Comelec kan Magarao, Camarines Sur kan Mayo 6, 2021 si Bise Presidente Leni Robredo pueding magpalista sa Comelec sa nagpapadagos na continuing registration sundo sa Septiembre 30, 2021.
An pagbalyong residencia ni VP Robredo kasunod man kan saiyang opsiyon na kun dai magdagos sa pagdalagan sa cargong presidente sa eleksyon sa 2022 planong magbaba nganing magcandidatong gobernador kan Camarines Sur.
Siya dating rehistradong votante sa Ciudad nin Naga alagad nin huli ta an ciudad na ini sarong independent city na an arin man na residente digdi discalificado magcandidatong gobernador o arin man na posisyon provincial.
Si Abogado Maico Julia Jr., Election Officer sa Ciudad nin Naga asin opisyal na parataram kan Comelec Camarines Sur nagpahayag kaini sa tahaw kan mga kahapotan sa isyu kun an sarong local elective official puede pang magpalista sa Comelec nganing maging votante sa sarong barangay o municipalidad asin calificadong magcandidato sa arin man na puesto lokal sagcod sa ultimo diya kan continuing registration sa Septiembre 30.
Ipinahayag ni Julia kun babasehan an probisyon kan Section 39 Chapter I kan codego lokal an mga cualificaciones kinababalehan na: 1. na sarong ciudadanong Filipino (citizen of the Phils); 2. Rehistradong votante kan barangay, municipalidad/ciudad o provincia; asin 3. Nag-eerok o residente kisiera sarong taon antes kan eleksyon.
Naka-establiser nin sarong taon na ‘‘residency’’ alagad dai man sinabi na dapat nakarehistro sa Comelec sarong taon antes kan pirilian, sabi pa ni Julia.
Sa lado ni VP Robredo naka-establiser na kan saiyang ‘‘residency’’ mantang bulan pa nin Marso 2021 nag-pupuli na ngani sa saiyang arkiladong semi-bungalow sa barangay Carangcang, Magarao, CSur.
An bise presidente nakarehistro na sa barangay mala ngani na-isyuhan na nin barangay clearance, solo parent ID asin naka-rehistro na sa Philippine Statistic Authority (PSA) para sa saiyang National ID. (DPAureus)