Wally Vargas, Orastigon sa Radyo

Ini an sarong pag reconoser sa magayon na kontribusyon ni Announcer Wally Vargas sa industria nin Radyo sa Bicol. Pinag hehedaw kan mga paradangog sa radyo an bilog asin makonsuelong boses ni Wally Vargas (gulpi an nagsasabi magka boses kami). Inot ko siyang nabisto mga huring taon kan dekada 70, kan maki usar nin telepono sa PT&T para mag report sa pambanguing programa (dai pa uso kaidto an vhf asin cellphone), ako kaya kaidto, naging extra morse code operator sa PT&T na an kontak ko iyo an Tabaco asin Labo Camarines Norte. Sa erestoryahan sa atubangan kan PT&T, ki Wally ko nadangog an estorya, na an babae daa sa Saudi Arabia kun gusto nang mag agom, nagbabandera nin katsang pula sa bintana. Naobserbaran ko ki Wally sa inot ming pagka bistohan iyo an hilig kaini sa estorya sa makonsuelong paagi kaya mga tawo naka palibot saiya ta mayo siyang pinag iba sa sarong entertainer. Kan panahon ni Celso Baguio, SM sa DWRN sa Queborac, saro si Wally Vargas sa sikat na Announcer na an programa iguang titulong Wasiwas alas 5 sagkod alas 6 nin Bangui. Iyo idto an programang nag No. 1 sa mga survey lalo na sa mga baryo asin kabukiran ta parating pig kukumusta ni Wally an mga taga baryo, an mga paraoma, an mga para badang, mga parabulong, mga parahilot, mga esperista asin an mga magagayon na kadaragahan sa kabukiran.

Nagpa lipat lipat nin estasyon nin radyo si Wally Vargas, alagad namantener an karisma kaini sa mga paradangog na yaon sa mga kabukiran. Sa pag dadayo me sa mga harayong baryo, saro sa hinahanap kan mga tawo iyo si Wally Vargas ta kasabay daa kaya kan pagsulnop nin aldao, an nadadangog iyo an boses ni Wally Vargas ta ini maisog asin frangka sa komentaryo alagad makonsuelo na pagdangogon. Baryotik si Wally ta nag gekan ini sa kinapobrehan duman sa Virac Catanduanes na an pagbuhay pano nin sakripisyo. Tanganing makatabang sa magurang asin mga tugang, pig plano ni Wally an mag adventure sa Naga. Inot siyang napadpad sa sarong pinsan sa Sabang Calabanga asin nagsunod nag istar sa Ateneo Avenue sagkod na nanuran ni Wally an lifestyle nin sarong Naguenio. Dara nin dunong asin marhay na edukasyon hale sa sadiring ganut, naka laog si Wally sa Insurance kasabay an paglaog sa radyo. Sarong lumang motorsiklo an service ni Wally sa saiyang pagreport sa radyo. Sa pagka rata nin mga dahon nin panahon, asin sa pagka pukit kan mga dahon nin kalendaryo, kadakol an lalong nagbilib ki Wally ta ini saro nang halangkaw na opisyal nin Insurance asin igua pa ining sadiring oficina sa nasyon kan Thailand. Nakapatugdok nin magayon asin dakulang harong sa Modern Village, Pili asin napag tapos sa mga marhay na escuelahan an saiyang mga aqui sa tabang kan saiyang magayon na misis, Susie Vargas.

Si Wally Vargas an nagpasikat kan karantahan na nag uusar nin Karaoke ta siya an Emcee kan Robertson Sing Along sa General Luna Street. An mga paradalan maogmahon na naka tirindog abot sa may tahaw kan General Luna na iyo an rason na magka buhol buhol lan trafiko sa lugar. Orgulloso si Robert Obiedo sa magayon na pagdara ni wally kan Robertson Sing Along ta iyo ini an pinaka maogmang dalanon sa Naga tuyong Sabado, iyo ini an bagong version kan Dalan sa Kalangitan na nauso sa Plaza Quezon. Saro sa dai malingawan ki Wally, iyo an ad lib na an boses hale pa sa matres. Si Tiyang Gloria agom Ni Pay Tobing kan Patong Pamplona, dai nanggad pig hahale an retrato ni Wally na nakabitay sa saindang sala. Si Tiyang Flor, paratanom nin Mani sa Karogkog Pamplona, nagsabi na sa pagsulnop nin aldao, oras nin pagpuli hale sa badang, boses ni Wally an inaagihan sa mga harong. Nagdakul an pangaran ni Wally sa linya nin Amateur Sing Along Contest. Mga harayong baryo sa Camarines Sur naka bandera an saiyang pangaran bilang Emcee sa Karantahan. Ninhuli sa pandemia, haros mayoria kan mga Senior Citizens nagpahingalo sa radyo. An saiyang mga tagahanga sa radyo naghahapot, Haen ka na Wally Vargas?