Waste water treatment proj sa NCPM madadagos na-SWMO

Pigcierto na kan Solid Waste Management Office (SWMO) na madadagos na an implementasyon para sa waste water treatment facility kan Naga City People’s Mall (NCPM) sa pagtukaw kan bagong administrasyon ni Mayor Elect Atty. Leni Robredo.

Kinumfirmar ni Engr. Joel Martin, pamayo kan SWMO na nagkaulay na sinda ni Atty. Robredo na saro sa saindang pig-ulayan na dapat madagos na an proyekto sa mercado huli ta nasa ‘‘one hundred percent’’ nang polluted an tubig hale sa mercado pasiring sa salog Naga.

Maabot sa P30-M an nakatagamang fondo digdi base sa 2025 annual budget kan ciudad. Kan nagtalikod na taon igua nang fondo an City Hall para sa kaparejong proyekto alagad hinugot nganing gamiton para sa rehabilitasyon.

Natutuyawan an lokal na gobierno kan ciudad huli ta apesar estricto nindang pinapasunod sa mga darakulang establisimiento alagad an NCPM na dating inaapod na pinakadakulang mercado sa South East Asia alagad mayong waste water treatment facility.

Afuera pa kaini, an bagong matukaw na jefe ejecutivo nagsabi na kabale sa dapat iimplementar iyo an rehabilitasyon nganing maseguro an kapusogan kaini.

Mientras tanto, sinabi pa ni Martin na saro sa binugtakan kan lokal na gobierno nin water treatment facility iyo an sanitary landfill sa Barangay San Isidro nganing maseguro na malinig an tubig na nagdadahilig sa salog.

An sinambit na facilidad saro sa mandato kan Department of Environment and Natural Resources (DENR) na naggastos an ciudad nin P29-M.