Welcome 2024

Dakulaon an sakong pagtubod na an taon 2024 marhay para sa kadaklan ta maluwas an mga katotohanan na nasa likod kan mga pangyayari ngonyan bako lang digdi sa nasyon kundi sa palibot kan kinaban.

Mabubuksan an nakatago sa mga bareta, propaganda, press release, praise release asin iba pang marites asin marisol sa politika asin showbiz, negosyo, sadit asin dakulang giyera, etcetera etcetera.

An gabos na naaraman ta, an satuyang kaisipan, pagtubod asin pananaw gabos ipigbahog sa satuyang payo por medyo kan media, lokal asin internasyonal. An giyera sa Israel, Ukraine, mga patudsada tungkol sa pig-aapod na West Philippine Sea o South China Sea, sintikan kan Congreso asin kan pamilya ni dating Presidente Digong Duterte, an porosisyonan kan kampo ni LRay asin dating VP Leni, maluwas ta maluwas an katotohanan sa taon na ini.

An mid-term election norong taon na 2025, an presidential election sa 2028. Harani na.

An aire panu-pano nin kadakul na espekulasyon.

***

Congratulations palan asin Mabuhay an sakong barkada asin high school batchmate na si Alice San Andres-Calleja kan Santa Barbara, California. Nagsara na an saiyang bulanan na diyaryo na pig-aapod na Misa Paper huli ta an imprinta na naguiguibo kaini sa laog nin 15 anyos nagsara na.

Huli ta magayonon an laog kan diyaryo poon sa mga importanteng pangyayari sa ciudad, mga outstanding na personalidad pigtawan ini nin honra kan City Council kan Santa Barbara.

Si Alice na sarong Naguena, CSI HS batch 66 nag-atubang sa konseho, kinurugos kan mga miyembros asin tinawan honra.

Sa kaogmahan si Alice nagkanta durante kan sesyon asin nagpahayag kan saiyang kamunduan kuta ta mapopondo na an diyaryo pero ogma ta pigbisto kan gobyerno kan ciudad.

Si Alice, 74 y/o, American Field scholar kan Santa Isabel kan 1966, orador sa Voice of Democracy kadto asin honor student kan Colegio, student leader, marhay magbayle, marhay magkanta. Aki siya ni depuntong Konsehal Ramon San Andres asin sobrena ni Senador Tecla San Andres Ziga, pinaka-primerong babaeng topnatcher sa bar examination sa Pilipinas.

Agom siya kadtong depuntong Noel P. Calleja, Atenista, naguin halangkaw na opisyal kan opisina kan migrant workers sa Pilipinas kan panahon ni Cory.

Kan kami ni Noel nasa UPLB kan dekada 60, ako an parasurat kan love letters niya ki Alice na nagbunga kan saindang pag-aragoman.

Kan dae pa oso an facebook asin internet kun nagsusurat sako si Alice haling America Bikol na Bikol. Bilang magbarkada nag-inoman kami nin bourbon asin vodka duman kan bisitahon ko siya kan 2006 saka 2008.

Si Alice an publisher, editor kan diyaryo an saiyang aking nguhod na si Miggy iyo an retratista.

Saro si Alice sa mga ring leaders kan mga Bikolanos/Bikolanas duman sa LA poon kan dekada 70 sagkod ngonyan.

***

Congratulation sa sarong DJ nin sadering FM radio station duman sa Buhi, si Gerry Gumba, edukador (dating Public Schools District Supervisor sa Milaor ) asin member kan batch 61 sa Ateneo HS. Duwang exhibits an binuksan niya, saro sa Naga City Civic Center asin saro sa Vista Mall kaiba an saiyang tugang na si Cesar Gumba na saro man na pintor.

Pinag-aaribunbonan an saiyang mga obra, pati si Congresman Sal Fortuno asin si Mayor Legacion nagbarakal nin nagkakapira.

Poco mas o menos 80 anyos na pero si Gerry tunay na talentado.

***

An mamundo lang ta ngonyan na taon maontok na daa si Konsehal Ervin Borja kan Tinambac kan saiyang programang “Ano daw banwaan?” aga-aga. Rason: sibot siya sa trabaho bilang legislador kan saiyang banwaan.

Sayang kan saro sa pinaka-matibay ma komentarista asin news analyst sa radyo ngonyan.

***

Congratulations palan sa mga 2023 KBP awardees: Congresman Sal Fortuno, Atty. Henry Briguera, Atty. Ric Diaz, Jo Grajeda, Jun Lagrimas, Elmer Abad, Al Ubaήa, Gil Basmayor Jr, Ernie Verdadero, Tony Betito, (posthumous).

Sinda an pigtitingag alabis pigsasalingoy kan new breed of broadcasters kan KBP ngonyan na panahon.