ZONA LIBRE (Free Zone o Frozen)
Bako lang tarabugaan asin raraotan sa Facebook o social media an nangyayari sa Camarines Sur poon pa kan nagtalikod na taon kundi parasingan nin paskil sa politika asin paggamit nin radyo sa pagtabuga kan kalaban na kandidato.
May mga presscon an ambus lados nagprepresintar kan saindang mga programa asin plano kasabay an pagtabuga sa kalaban asin pagmenos kan pagkatao kan ka-kontraryo sa politika.
Igwa na pating binawian nin buhay na pigsasahot sa politika an dahilan, igwa nin mga sekretong kandidato arog digdi sa tercier distrito na an toyo ihulog an incumbent congressman.
An pagkandidato ni VG Imelda Papin para gobernador talagang piglalaoman man ta an sikat na para kanta na taga-Presentacion tunay na Marcos loyalist poon pa kan panahon antes kan EDSA Revolution. Mahatak siya nin boto hali ki VP Leni para ki (“front runner/son of a dictataor”) Ferdinand Bongbong Marcos Jr. tanganing dai ma-solido an boto ki Leni digdi sa region V.
Si Bokal Nelson Julia Bise ni Papin nagdalagan para sa ikaduwang pwesto ta maski incumbent mayaman, may sadering gibohan nin higanteng billboards pero tubod na dai siya magana ta kalaban siya ni Cong LRay asin ni Gov. MIGZ Villafuerte.
Naturalmente si Julia maski taga-Magarao makampanya man guiraray ki Leni na may harong sa Magarao asin bakong para ki BBM.
An Camarines Sur baga an pinakadakulang provincia sa Kabikolan, 35ng banwaan asin duwang ciudades, bilyonaryo sa IRA asin centro nin negosyo asin agrikultuta sa bilog na Bikolandia.
An Camarines Sur nagproducir nin mga matataling aki na nagsirikat sa politika arog kan mga Fuentebella, Raul S. Roco, Luis R. Villafuerte Sr., Tecla San Andres- Ziga, Juancio F. Triviṅo, Eddie Ilarde mag-amang Jaime Hernandez Sr. asin Dolores Hernandez Sison, Rolando Andaya Sr., Jesse M. Robredo asin iba pa.
Sabi ngani kaidto ni Senador John Osmeṅa kan Cebu bastang suportaran kan Camarines Sur na kandidato kan Bikol para senador seguradong gana.
Ngonyan an pinakasikat na taga-Camarines Sur asin Naga iyo si VP Maria Leonor “Leni” Santo Tomas Gerona Robredo na pwedeng iyo an magsunod na presidente kan Republika kan Pilipinas.
Sa negosyo asin industriya nin pelikula dakol pang taga-Camarines Sur an naguin bantogan arog ki Amalia Fuentes, Nora Aunor, Ronald Remy, Ramon D’Salva, Rez Cortez, Victor Wood asin kadakul-dakol pang iba.
Pero huli ta sadit an satong populasyon en comparacion sa mga rona duman sa Minadanao, Kabisayaan, sa parteng Northern asin Central Luzon kun kaya sinasakit kitang magguno ni dakul na boto kun napapalaban sa eleksyon nasyonal.
Sa negosyo an pinakasikat si Lucio Tan na nagdakula sa Tabuco Naga City asin ngonyan saro sa pinakamayaman na negosyante sa nasyon.
Huli kan dikit an satong botante ngonyan lang nagkaburunyog an mga Bikolano sa anom na provincia asin pitong ciudades na suportaran, ikampanya, borotohan asin paganahon si VP Leni bilang pamayo kan gobyerno nasyonal.
Garo magana pati si VP Leni ta makusog an tanog niya sa social media, suportado kan dakul na Pilipino sa Amerika, asin tibaad iyo pa an suportaran kan Estados Unidos de Amerika arog ni Presidente Joe Biden, si Leni iyo an pandok kan Liberal-Democrats sa parteng ini kan kinaban lalo na ta mainit an isyu kan West Philippine Sea.
Nagluwas sa bareta na apesar na haros gabos na kandidato sa manlaen-laen na posisyon poon gobernador, congressmen, alkalde pati an tolong kandidato sa Naga gabos pigdadara si Leni. Haros pigtataas an kamot ninda sa mga rally asin sa mga paskil na lakop sa mga lanob asin kudal sa enterong Kabikolan na pig-eendorsar an saindang kandidatura ni VP Leni kaya sinda ki VP Leni man.
Pero an poderosong dinastiya kan mga Villafuerte mayo nin manok na presidente ergo zona libre o free zone. An boot sabihon an mga kandidato kan Team 1 Cam Sur ni LRay, ni MIGZ asin ni Luigui poon mga deputado asin mga konsehales bahala sindang magkampanya para ki Leni o sa kalaban kaini na si BBM asin Mayora Sara Duterte para vice-presidente.
Mahapot kamo kun tano ta napasiring. Madaling maintindihan ta bako lang na amigo kan mga Villafuerte poon kadto ki LRV na pigsasabing Imelda Boy kan panahon, si LRay saka si Bongbong mag-amigong tunay asin kan probaran na bangaon kan mga Fuentebella an Camarines Sur kan 2011 sinurog ni BBM bilang chairman kan senate local government committee si LRay kaya dai nabanga an Camarines Sur. Kuta na makakasuhay an Rinconada asin Partido bilang separadong provincia.
Kun iisipon si Leni asin si LRay magpartidaryo ta si Jesse M. Robredo sobreno kadto ni LRV. An ama ni Jesse na si Peping magprimo saka si gurang na Villafuerte.
Si LRV an nagpa-director sa BRBDP ki JMR kan 1987 paka-EDSA Revolution. Si LRV pa an nagpakandidatong Mayor ki Jesse sa Naga kan 1988.
The rest is history.
Sabagay maski kiisay ki BBM asin ki Leni an magluwas sa resultado kan eleksyon bilang presidente may taya si LRay.
Diyan frozen an pelikula kaya maghalat kita kan maguiguin resultado pakatapos kan Mayo 9. Masdan ta an daralagan kan kampanya sa bilog na provincia pati sa Naga tanganing maaraman ta kun ano an kaabtan kaining posisyon kan mga Villafuerte na Zona Libre.
Abangan, antabayanan.